હું અને એ

જિંદગીની રફતારમાં દોડતા દોડતા, મેં જોયું
એ પણ લગભગ મારી સમાંતર જ દોડી રહ્યો હતો
અમારી નજર મળતી ને મન થતું ચાલને જીવ!
લઈ હાથ હાથમાં ગીત ગણગણીએ

ક્યારેક એની આંખ હરીફની આંખ લાગતી
હું દોડતી ને એથીય વધુ વેગે એ દોડતો
એકબીજાને માત કરવા જ જાણે અમે દોડતા

હવે અમે એકબીજાથી નજર ચૂકવીએ છીએ
એ મને ગળી જવાના પ્રયત્નોમાં રાચે છે
ને હું, હું હવે આંખ બંધ કરીને દોડું છું
દિશાશૂન્ય દોડ્યા કરું છું દોડ્યા જ કરું છું.

-મીના